Actualidade

En 'Facer calar este silencio: a galeguidade escénico-musicada no ocaso dos Séculos Escuros' Javier Gándara analizará como a música, o teatro e os espectáculos públicos do século XVIII contribuíron á formación de determinados discursos sobre Galiza e os galegos.

Javier Gándara é doutor pola Universidade de Santiago de Compostela e autor d'A música dos desprazados. Teatro lírico e galeguidade durante o longo século XVIII (Compostela / Madrid / Lisboa), obra editada por aCentral Folque que propón unha lectura innovadora da historia cultural galega a partir do estudo do teatro musical e das artes escénicas entre mediados do século XVIII e comezos do XIX.