Actualidade
O volume está coordinado por Manuel Ferreiro, membro de ILLA, coa colaboración de Leticia Eirín, tamén membro do grupo, xunto con Mariña Arbor Aldea (USC) e Bieito Arias Freixedo. (UVigo).
Nestes días vén de publicarse o volume Universo Cantigas. II. Cantigas de Amigo, da autoría Manuel Ferreiro (coord.), Mariña Arbor Aldea, Bieito Arias Freixedo e Leticia Eirín e editado polo Servizo de Publicacións da Universidade da Coruña.
A obra recolle a edición das 501 cantigas de amigo galego-portuguesas transmitidas polos cancioneiros medievais.
O texto crítico de cada cantiga vai acompañado dunha paráfrase en galego actual, ademais da indicación das fontes manuscritas, das edicións anteriores existentes e dun código QR que liga cada poema coa súa edición dixital completa na web Universo Cantigas (https://universocantigas.gal/), ofrecendo así unha experiencia enriquecida e accesíbel.
Universo Cantigas é un proxecto do grupo de investigación ILLA (Investigación Lingüística e Literaria Galega) da Universidade da Coruña financiado polo Ministerio de Ciencia, Innovación e Universidades.
